İran İslam Respublikasının hökuməti bəyanat yayıb.

Az.rasthaber.com xəbər verir ki, bəyanatda İran xalqına dərin minnətdarlıq ifadə edilərək vurğulanıb ki, heç bir kukla rejim İran xalqının birliyinə və həmrəyliyinə zərər verə bilməz.

Bəyanatın tam mətni:

“Rəhmli və Mərhəmətli Allahın adı ilə”

Qəhrəman İran xalqı!
Doğma torpağımızın sionist rejimə qarşı ümumxalq müdafiəsi, Allahın köməyi və Ali Baş Komandanın müdrik rəhbərliyi sayəsində, igid və qüdrətli silahlı qüvvələrimizin güclü əlləri, uzaqgörən və ağıllı kəşfiyyat orqanları, fədakar polis qüvvələri, eləcə də diplomatik səylər və xüsusilə sizin daim davam edən dəstəyiniz nəticəsində 12 gün ərzində bəhrəsini verdi. Həmrəylik və birlik ruhu içində aparılan bu müqavimət sionist rejimi və onun havadarlarını təslim olmağa və atəşkəs təklif etməyə məcbur etdi.

Hər kəsə məlumdur ki, İran ABŞ ilə dolayı danışıqlar apardığı vaxtda, sionist düşmənin vəhşicəsinə hücumu nəticəsində çox sayda qadın, uşaq, günahsız insan, əziz alimlər və rəşadətli hərbi rəhbərlər şəhid oldu. İran İslam Respublikasının siyasəti heç vaxt təcavüzə başlamaq olmamışdır, lakin o, həmişə macərapərəstliyə, təcavüzə və işğala son qoyacaqdır.

Bu böyük və tarixi qələbə, hər şeydən əvvəl, səbr və möhkəmliyi ilə qələbəni təmin edən və düşməni öz niyyətlərinə görə peşman olmağa vadar edən xalqa borcludur. İranlılar bu müharibədə bir daha sübut etdilər ki, onlar doğma İran bayrağı altında birləşmiş, vətənə sədaqətli və fədakar bir millətdirlər və bütün çətinliklərə baxmayaraq, ölkələrini müdafiə edirlər.

İndi özümüzə borc bilirik ki, milli birlik və həmrəyliklə bir qəhrəmanlıq dastanı yaratmış, düşmənin qarşısında keçilməz bir sədd qurmuş və onun qara niyyətlərini həyata keçirməsinə imkan verməmiş qəhrəman xalqımıza dərin təşəkkürümüzü və sizə xidmət etməkdən duyduğumuz qüruru təvazökarcasına bildirək.

İran İslam Respublikası hökuməti bu milli birliyin bütün düşüncə və cərəyanların iştirakı ilə – həmrəylik və mərhəmət “göy qurşağı”nı təşkil edən müxtəlif zümrələrin – qorunmasını və davam etdirilməsini prioritet hesab edir. Eyni zamanda, ölkənin icra və idarəetmə orqanlarına, səhiyyə işçilərinə və xidmət sahələrinə təşəkkürümüzü bildiririk ki, əsas məhsulların təminatında, xalqın təcili ehtiyaclarının qarşılanmasında, infrastrukturun və ictimai nəqliyyatın qorunub saxlanmasında əvəzolunmaz rol oynamış və çətin şəraitdə cəsarətlə fəaliyyət göstərmişlər. İran İslam Respublikasının Xarici İşlər Nazirliyinin fəal və təsirli rolu bu milli qələbənin dönüş nöqtəsinə çevrilmiş və təqdirəlayiqdir”